Azərbaycan Respublikası Prezidentinin müvafiq Sərəncamına əsasən, Cəlilabad rayonunda Sərhədabad–Əliabad–Zəhmətabad–Soltankənd avtomobil yolunun yenidən qurulması davam etdirilir.
Azərbaycan Avtomobil Yolları Dövlət Agentliyi tərəfindən icra olunan layihə ümumi uzunluğu 18 kilometr olan və 7 mindən artıq əhalinin yaşadığı 9 yaşayış məntəqəsini əhatə edən yolun yenilənməsini nəzərdə tutur.
Hazırda yolun 2,3 kilometrlik hissəsində asfalt-beton örtüyünün salınması başa çatdırılıb. Digər hissələrdə torpaq işləri və yol əsasının tikintisi aparılır.
Dayanıqlığın və hərəkət təhlükəsizliyinin təmin edilməsi məqsədilə 9 nöqtədə suötürücü borular quraşdırılır.
Tikinti prosesi müasir inşaat norma və qaydalarına uyğun həyata keçirilir. Layihə başa çatdıqdan sonra yaşayış məntəqələri arasında nəqliyyat əlaqələri yaxşılaşacaq, gediş-gəliş daha rahat və təhlükəsiz olacaq.
Yenilənən yol həmçinin rayonun sosial-iqtisadi inkişafına töhfə verəcək.
